Xperia Z ជាង ២ ខែ​ធ្លាក់​ថ្លៃ​ជិត ២ សន្លឹក
 បង្ហាញ​ខ្លួន​លើក​ដំបូង កំពូល​ទូរ​សព្ទ​ឆ្លាត​វៃ​ Xperia Z របស់ Sony ថ្លៃ​ជាង ៧​០០ ​ដុល្លារ ប៉ុន្តែ​​លេច​មុខ​បាន​ត្រឹម​តែ​ជាង ២ ខែ​ ​ស្រាប់​តែ​​ទូរសព្ទ​មិន​ចេះ​ជ្រាប​ទឹក​ពេល​នេះ ធ្លាក់​ថ្លៃ​​អស់​ប្រហែល ២​សន្លឹក ​មក​សល់​ត្រឹម​តែ​ជាង ៥០០ ​ដុល្លារ​។

•  ម្ចាស់​ហាង​លក់​ទូរសព្ទ​ដៃ សុខ លី បាន​បង្ហើប​ប្រាប់ Sabay ថា Xperia Z ឥឡូវ​នេះ តម្លៃ​លក់​ចន្លោះ​ពី ៥៥០ ទៅ ៥៨០ ដុល្លារ។ “Xperia Z បាន​ធ្លាក់​ថ្លៃ​​លឿន​មែន​ទែន ព្រោះ​កាល​យក​មក​លក់​លើក​ដំបូង​តម្លៃ​ជាង ៧០០ ដុល្លារ​ឯណោះ”។ 
•  ចំណែក​ឯ​ម្ចាស់​ហាង​លក់​ទូរសព្ទ​ដៃ រ៉ាណេ ១៦៨ វិញ​ក៏​ឲ្យ​ដែរ​ថា បើ​ធៀប​ស៊េរី​ទូរសព្ទ​ទំនើបៗ​មួយ​ចំនួន​ទៀត Xperia Z ​គឺ​ធ្លាក់​ថ្លៃ​លឿន​ជាង​គេ។ លោក​ថា ធ្លាក់​ថ្លៃ​លឿន​បែប​នេះ អាច​ដោយសារ​មាន​ការ​ប្រកួត​ប្រជែង​ខ្លាំង​​ពី​ម៉ាក​ទូរសព្ទ​ផ្សេង​ទៀត ជា​ពិសេស​ខណៈ​ដែល​ផលិតផល​ទូរសព្ទ​ស៊េរី​ទំនើបៗ​របស់ Samsung និង Apple បាន​ក្លាយ​ជា​ជម្រើស​ក្នុង​ការ​ទិញ​យក​ទៅ​ប្រើប្រាស់​របស់អតិថិជន​។
•  ម្ចាស់​ហាង​លក់​ទូរសព្ទ​ដៃ​ដែល​កំពុង​តែ​ល្បីល្បាញ​លើ​គេហទំព័រ​ Khmer24 ក៏​ឲ្យ​ដឹង​បន្ថែម​ទៀត​ថា Xperia Z​ ឥឡូវ​មិន​សូវមាន​គេ​សាក​សួរ​រក​ទិញ​ច្រើន​នោះ​ទេ។ ជុំ​វិញ​បញ្ហា​នេះ លោក វន សុវណ្ណារី អនុប្រធាន​ក្រុមហ៊ុន​ Sayam ជា​អ្នក​នាំ​ចូល​ផលិត​ផល Sony បាន​ឲ្យ​ដឹង​ថា ការធ្លាក់​ថ្លៃ​តម្លៃ Xperia Z នៅ​លើទីផ្សារ​កម្ពុជា គឺ​ដោយសារ​នៅ​លើ​ទីផ្សារ​សាកល​ក៏​មាន​ការ​ធ្លាក់​ថ្លៃ​ដូច​គ្នា​នេះ​ដែរ។ 
• យ៉ាង​ណា​ លោក​ថា Xperia Z នៅ​តែ​ទទួល​បាន​ការ​ពេញនិយម​ពី​អ្នក​ប្រើប្រាស់​ ដោយសារបច្ចេកវិទ្យា​និង​​លក្ខណៈ​ពិសេសៗ​ ដែល​បំពាក់​នៅ​លើ​ទូរសព្ទ​ស៊េរី​ទំនើប​នេះ។ ជាមួយ​គ្នា​នេះ លោក​បន្ថែម​ថា ការ​ធ្លាក់​ថ្លៃ​នេះ ក៏​ជួយ​កាត់​បន្ថយ​ការ​ចំណាយ​របស់​អ្នក​ប្រើប្រាស់ ជាពិសេស​អាច​​ទាក់ទាញអតិថជន​​ក្នុង​ការ​សាកល្បង​ទិញ​ Xperia Z យក​ទៅ​ប្រើប្រាស់​តាម​តម្រូវ​ការ​ផ្សេងៗ។
• នៅ​លើ​គេហទំព័រ​របស់​ហាង សុខ លី Xperia Z តម្លៃ​លក់​នៅ​ប្រហែល ៥៥០ ដុល្លារ​អាមេរិក។