ជឿអត់? អ៊ិន​ចុច​ពិល​ថ្មី​កាន់​ថ្ម​បាន ១ ខែ!

ជឿអត់? អ៊ិន​ចុច​ពិល​ថ្មី​កាន់​ថ្ម​បាន ១ ខែ! 

អ្នក ​ណា​ៗ​ក៏​ដឹង​ដែរ​ថា Nokia 1280 ស្ថិត​នៅ​ក្នុង​ចំណោមទូរសព្ទ​​ស៊េរី​អ៊ិន​ចុច​ពិល (អ្នក​ប្រើប្រាស់​និយម​ហៅ) កាន់​ថ្ម​បាន​យូរ​ជាង​គេ ដោយ​អាច​កាន់​ថ្ម​បាន​ជាង ១ អាទិត្យ​ឯណោះ។ តែ​ពេល​នេះ Nokia 1280 ប្រហែល​ជា​មិន​អាច​គ្រង​​មកុដ​​របស់​ខ្លួន​បាន​ទៀត​ឡើយ ព្រោះ​ថា​ Nokia 105 អ៊ិន​ចុច​ពិល​ស៊េរី​ថ្មី​បាន​មក​ជំនួស ដោយ​ក្រុម​ហ៊ុន​ប្រកាស​ថា​105​កាន់​ថ្ម​បាន​ដល់​ទៅ ១ ខែ​ឯណោះ។ មែន​អត់ អ៊ិនចុច​ពិល​ស៊េរី​ថ្មី​ហ្នឹង កាន់​ថ្ម​បាន​ ១ ខែ?

​ ស្រីអូន ម្ចាស់​ហាង​លក់​ទូរសព្ទ​ដៃ​ក្បែរ​ស្តុប​ពេទ្យ​ចិន បាន​ឲ្យ​ដឹង​ថា៖ “​ភាគ​ច្រើន​​អ្នក​ទិញ​យក​ទៅ​ប្រើ​​ ក៏​មិន​នឹក​ស្មាន​ថា Nokia 105 ស៊េរី​ថ្មី​ហ្នឹង​កាន់​ថ្ម​បាន​មួយ​ខែ។ ប៉ុន្តែ​ស្រាប់​តែ​ប្រើ​បាន​មួយ​រយៈ​មក​ ទើប​ដឹង​ថា​ទូរសព្ទ​ម៉ូដែល​នេះ ពិត​ជា​កាន់​ថ្ម​បាន​យូរ​ផស់​គេ​មែន។”​ អ្នក​លក់​វ័យ​ជាង ២០ ឆ្នាំ​រូប​នេះ អះអាង​​​ទៀតថា​ “ខ្ញុំ​និយាយ​នេះ​មិន​សំអាង​លើ​សម្ដី​អ្នក​ទិញ​​តែ​មួយ​នោះ​ទេ ដោយ​ខ្ញុំ​ក៏​ធ្លាប់​សាក​ប្រើ​ស៊េរី​ហ្នឹង​ដែរ”។

Nokia 105 (អ៊ិនចុចពិល​ស៊េរី​ថ្មី) តម្លៃ​ចន្លោះ​ពី ២២-២៥ដុល្លារ​ មិន​ចូល​ដី-មិន​ជ្រាប​ទឹក

ម្ចាស់ ​ហាង​រូប​នេះ​បន្ថែម​ថា ​អតិថិជនជា​​ច្រើន​នាក់​ហើយ ដែល​បាន​បក​មក​ទិញ​ថែម​មួយ​ទៀត ​បន្ទាប់​ពី​បាន​ដឹង​ថា ទូរសព្ទ​ស៊េរី​នេះ​​​ថ្មពិត​ជា​កាន់​បាន​យូរ​ និង​ធន់​ក្នុង​ការ​ប្រើប្រាស់​មែន​នោះ។

ទូរសព្ទ​លំដាប់ធុន​មធ្យម Nokia 105 ត្រូវ​ក្រុមហ៊ុន Nokia ប្រកាស​បង្ហាញ​រូបរាង​កាល​ពី​ខែ​កុម្ភៈ​ដើម​ឆ្នាំ​នេះ ដោយ​មាន​បំពាក់​ឧបករណ៍​ដែល​អ្នក​ប្រើប្រាស់​ត្រូវការ​ប្រចាំថ្ងៃ​មួយ​ ចំនួនដូចជា​វិទ្យុ​​អេហ្វអឹម​, នាឡិកា​រោទិ៍ និង​ពិល​​ជាដើម។ ក្រៅ​ពី​នេះ Nokia 105 ក៏​មាន​ប៊ូតុង​មិន​ចូល​ធូលី​ និង​មិន​ជ្រាប​ទឹក​ថែម​ទៀត​ផង។

អ្វី​ដែល​ជា​ពិសេស​នោះ​គឺ​ថាមពល​ថ្ម អាច​កាន់​​បាន​ដល់​ទៅ​ជាង​មួយ​ខែ​ឯណោះ។ Nokia 105 តម្លៃ​លើ​ទី​ផ្សារ​បច្ចុប្បន្ន​នេះ ស្ថិត​ក្នុង​តម្លៃ​​ចន្លោះ​ពី 22 ទៅ 25 ដុល្លារ មាន ២ ពណ៌​គឺ ខៀវ និង​ខ្មៅ៕

ប្រភពដើមៈ សsabay